UMA LUBHALIWE LUBHALIWE!!!!

Ngicishe ngafa ngaloLwesihlanu lwa namuhla.

Nelson Mandela Senguyena uJesu

Nizwile yini, Bakithi? Sekushiwo phela futhi kwacaca ukuthi uJesu waseNingizimu Afrika ngubani njengokuchaza kwephepha lesiNgisi njengoba nawe ungazibonela uma UCINDEZELA LAPHA. (Futhi uma ufuna ukwazi kabanzi ngaloludaba ngalo belu ulimi lukaJoji, CINDEZELA LAPHA).

Ngisho noMbhishopi omkhulu uDesmond Mpilo Tutu lona wangakuboloJesu-WaseNazaretha-Qunu ngokobuhlanga uthule cwaka ngalokhu kanti zolo lokhu, uMongameli wethu uJacob Zuma kwathi abamudle bamfele abefundisi bobuKrestu ebeka-nje umbono wakhe nami futhi engiwesekayo ukuthi KUYOZE KUBUYE UJESU WASENAZARETHA UKHONGOLOSE EBUSA ESOUTH AFRICA.

Bakithi, Make siyeke ukwenza izinto ngokobuhlanga. Uma kungafanele ukuthi umuntu onguMzulu alulaze igama likaJesu; akufanele abantu abangabaThembu noma bengaba yisiphi isizwe bona bavunyelwe ukululaza igama leNkosi uJesu! Kwalona leliphepha elishicilele lembuqe (ngeSixhosa) belicabangeni?

Mandela wansondo lona osebizwa ngoJesu akaguli-nje ubangwa nezibi futhi sekuseduze abhekane nesihogo noma ayekwalasha uma izono zakhe engakazilungisi noMdali wakhe, ikakhulukazi lemiphefumulo eyizinkulungwane eyakhishwa ngegama lakhe kwezombangazwe KwaZulu-Natal.  Uyoya kuphela ezulwini noma eParadesi uma ewushiya umhlaba eselungise indlela yakhe noJesu, usho uMbhalo.

Nina-ke esenimbiza ngoJesu WaseQunu ekanti eZulwini kukhona uJesu WaseNazaretha, nicabanga ukuthi uJesu lowaseNazaretha uyomvumela yini ahlale naye eParadesi likaYise uNkulunkulu uma Jesu-Qunu ndisni esezishaya uJesu NEMBE-2?  Nake nazibonaphi izinkunzi ezimbili esibayeni esisodwa?

Uma nazi kahle kamhlophe ukuthi aziphelelanga lapho kinina, wayekeni amanzi amponjwana.  Uma nazi ukuthi aziphelelanga futhi aniwayekanga amanzi amponjwana, yekani ukubhala niphuzile bafowethu nodadewthu ngiyanincenga.  Uma nazi ukuthi aziphelelanga kanti nidakwa nayilobu bokubanjelwa maqedane nifune ukubhala, BHALANI NGABO UTSHWALA LOBO BENU KEPHA NINGABHALI NGEPOLITIKI KAKHONGOLOSE OMDALA NGISHO KUNALOJESU WENU MBUMBULU...1912!!!

Ingxaki ekhona ngokuthi uNelson Mandela egula engaguli abizwe ngoJesu yikho belu ukuthi namakholwa ayekade ezimisele ngalenkolo yobuKrestu, ayogcina edubile abone ukuthi “ubuKrestu yinkoloze nje yokwenza abantu bathithibale ngapha izwe labo libe lithathwa kabusha ngaMangisi ngendlela yobukoni-simanje kusetshenziswa bona belu oJeswana abancane laba abangaveli nokho naseNazaretha”.

Ningakhohlwa bakithi ukuthi ukusetshenziswa-budedengu kwenkolo abanayo abantu abanyama ukuze kuthathwe izwe labo ngaMaNgisi yinto eyaqala namhlanje iminyaka engama 154 edlule lapho iNgonyama YaMaXhosa (Bayedeeee!) uSarhili aluthwa khona ngamasosha Amangisi ngokusebenzisa inkolo yakhe ukuthi makubhujiswe zonke izinkomo zakwaXhosa kushiswe nezitshalo ngoba phela siyazi ukuthi AmaXhosa endlu yeNkosi uPhalo (hhayi iNkosi yabaThembu eyayingumthengisi eMangisini) yiwona amaqhawe amakhulu kanye noShaka kaSenzangakhona Zulu abevikele iAfrika yethu ukuthi ingathathwa ngaMangisi.

Kuthe lapho eseluthwe ngenkolo yakhe uSarhili emva komhlangano owabanjwa osukuwini olufana nalo lolu esikulo 31 January 154, labhubha izwe likaXhosa ngokusetshenziswa kwentombazanyane uNongqawuse naye owayeluthwe yisosha leNgisi elalizipendile lizenza idlozi lamaXhosa kanti kuyindlela yokuthi umntu omnyama alutheke nje.

Ngokumbiza uJesu engeyena uJesu, ingabe noBaba uMandela senimenza naye uNongqawuse wesibili na?

eMAQADINI MEDIA: NGOWANI LO MSINDO NGOKUQANJWA KABUSHA KWE-KZN?

eMAQADINI MEDIA: NGOWANI LO MSINDO NGOKUQANJWA KABUSHA KWE-KZN?

IZINYANGA EZIMBILI GONQO NGIKHALE KUWE BABA ZUMA LUTHO IMPENDULO

Baba uZuma! Mongameli weZwe leNingizimu Afrika! Mkhuzi-Omkhulu-Wami eMbuthweni WeZokuvikela

Kunenkolelo kwezokuphathwa kwezwe ukuthi uma umuntu enengxaki yakhe yombelebele nensakavukela okomchilo wesidwaba, impicabadala eyamphatha belu oweNkosi selokhu kwathi nhlo, leyo nkanankana iyaye idambe kuthi dlwe uma-nje eseke wayibika kwabakhulu abanjengawe, Baba Mongameli weNingizimu Afrika!

Angikholwa-ke mina ukuthi lowo mbono nalelothemba abantu balelizwe abanalo ngehhovisi likaMongameli wabo yinkoloze-nje.

Kepha ngikholwa ukuthi uma-nje lowomuntu esekhale kuMongameli usizo lufika qathatha wena owabona OloMhlabeleli Owaphakamisela Amehlo Akhe Ezintabeni!

Lento, Baba, yokuthi thina abantukazana sibhalele oMongameli izincwadi indathane nesivivi uqobo lwaso kepha ncwajana zimbe zingaphendulwa kwakuphendulwa ngaphandle-nje kwencwajana ebhalwe ngumuntu thile ongeyena uMongameli wezwe kepha engumongameli wamapakla esisu sakhe esibomvana ngoba esebenza duze noMongameli wezwe esho ngesiNgisana ("we have received we acknowledge") kuphelele lapho, kwakungumkhuba-nje ongcolile kaMnumzane uThabo Mvuyelwa Mbeki, naye enziwa ukuthi lezizigilamkhuba ezicindezele uGoodman Manyanya Phiri ngoba-nje engeyena uMthembu kaMandela noma umuntu obuya eMpumalanga Koloni lapho phela ngokobuningi bevela khona labacwasi ngokobuhlanga abaholwa ngu Mama uLindiwe Nonceba Sisulu kulezinsuku.

Phela, uMnumzane uMbeki wayazi kamhlophe ukuthi umgogodla wokuphatha kwakhe ilizwe wawuqiniswe yibo ubuhlanga lobu baseKoloni laBaThembu, bese kuthi thina abanye abantu baseNingizimu Afrika sibonwe njengabantu abanamakhanda angathathi kahle uma sikhala ngokucindezelwa ngaBaThembu bakaMandela nezinye izizwe zaseMpumalanga Koloni zelekelelana naMangisi lapha eMbhuthweni Wezokuvikela Izwe.

Uphi-pho, namhlanje uMbeki wansondo? BAMKHIPHILE NGESIDLOZANE ABANTU BASENINGIZIMU AFRIKA NGOBA BENGAWUFUNI UMKHUBA WOBUHLANGA OKWATHI UMQAMBI KAKHONGOLOSE, UBABA UPIXLEY KA-ISAKA SEME INDABA YAWO WAYIBEKA NGOKUTHE BHA NJENGESISEKELO SOKUBUMBA UBUNYE BAMAAFRIKA NGAPHANSI KWE-AFRICAN NATIONAL CONGRESS YABANTU BASENINGIZIMU AFRIKA!

Siyazi, nokho, Baba uNxamalala ukuthi ukuthi kukhona umdodovu nencelebana enkulu yaMaNgisi ezishaya sengathi yiyona engumqambi weANC: kepha asinandaba nalokho ngoba iqiniso ngoSeme siyalazi.

Ngiyakucela-ke, Msholozi: ukuthi mawungathathi umkhuba omubi owawenziwa nguThabo Mbeki... ngithi lapho ngikubhalele incwadi yokuthi ngicela ukhulume phela noLindiwe Sisulu anginike imali yokukhokhela abameli bami eNkantolo eNkulu njengoba nawe Baba wawukhokhelwa nguMbuso leyomali ngenkathi wethweswe amacala okweba imali nokukhwabanisa, bese wena Msholozi uwuhlaba enhlalini uwuhlab' esiqundwini-nje ngoPhiri ngoba usufakana amathe nalabo kade bekucindezele ekuqaleni.  KUYOKUPHELELA, BABA, FUTHI MINA ANGIFUNI NGIBE YISIQALEKISO KUWE NJENGOBA NGIZALWA NGAMAKHOSI MINA FUTHI AKEKHO ODLALA NGAMI MAQEDANE ASINDE!

Baba uZuma! Nxamalala! NGIYAYIDINGA NGOKUKHULU UKUSHESHA LE-R300,000 ANGIKWELETA YONA UMAMA ULINDIWE SISULU, FUTHI NGIYIFUNA NJENGOBA KUZOQALA U-JANUWARI UKUZE NGIPHONSELE INSELELE LELIJAJI USOUTHWOOD ELIYE LAVUNA ULINDIWE SISULU NGO-NOVEMBA 10 2010 FUTHI LIMVUNA NGAPHANDLE KOKUBHEKA AMAPHUZU LILOKHU-NJE LIBHEKE UKUTHI UMKHULU KA-MAMA ULINDIWE SISULU LINGISI-NJE ELIFANA NAJAJI LANSONDO.

Musa-ke, Baba, ukuzithola ufakana amathe nabenzi bobutha obudala kumaAfrika (ukucwasana ngokobuhlanga okuyinto ayelwa nayo uMqambi weANC uSeme), kuthengiswe ngoPhiri ngoba kuyoba buhlungu uma izinduku sezibuya!


I-ANC ayikubekanga, Baba, kulesikhundla okuso ukuthi kuphele-nje amacala akho, neze!


Kepha ikubekele ukuthi usize isizwe sonke sixazulule izinkinga zokucwaswa njengoba ngecwaswe iminyaka engamashumi amabili namuhla ngaBaThembu bakaMandela behlangene naBeLungu.


Ngiyakucela, Baba, ngiyakunxusa: makwande ukusebenza kunciphe amagama, futhi mina ngingethande ukucagulisana ngamagama nomuntu omkhulu nomdala njengawe, kepha ngiyobe ngenza iphutha elikhulu uma ngithula kepha ngibona ukuthi sengathi nawe wenza nse okwakwenziwa nguMnumzane uThbo Mbeki: UNGIKHAPHELA EZITHENI ZAMI OSISULU NGOBA ZONA ZINGABANGANI KUWENA.

Shwele, Baba uZuma!  Ake kunciphe amandla okuphatha izwe kwande uthando!  Phela bonke abanamandla bayathotshiwa---uyasho noMbhalo---uma bengafuni ukuthobela umthethosisekelo wezwe lethu iNingizimu Afrika!

Amalungelo ashicilelwe kuMthethosisekelo awabandlululi umuntu omkhulu uZuma komncane uPhiri.  Lokho kusasho khona belu ukuthi inqobo-nje uma uMsholozi wayekhokhelwa imali yabameli evikela icala lokwekhwabanisa ezivikela enkantolo enkulu, kanjalo noPhiri imfanele leyomali njengoba egqigqiswa nguLindiwe Sisulu ezinkantolo ezinkulu imihla namalanga  Ngakho-ke, ake sibheke uMthethosisekelo, Nxamalala, siyeke izindaba zobungani bukaZuma noMandela noma ubutha bukaPhiri noSisulu. Lenhlangano ephethe iNingizimu Afrika... uKhongolose phela... yindala kunathi sonke futhi idlozi layo, yize linganakwa-nje ngogumbelakwesabo abafisa ukushintsha umlando walelizwe bawunike AbaThembu bakaMandela nalaMangisi asaxhaphaza umnotho wethu ngisho nanamhlanje.

Idlozi le-African National Congress ngu

Sinono kaKhuwana!

USibhudubhudu esinamawala!

Mahlal'ehlomile emizini yamadoda!

Isiphepho esiyinqaba esiza kabi siyakhandanisa!

Abanezingane mabazitshathe emahlombe kuthi abadala bazozibonela!

Isinyakuzane saseNgulane!

Nkunzana engumbhuqwana!

Ehlupha amajaji ekhothi!

Ngikhuluma ngaye phela uPixley ka-Isaka Seme, umqambi we-ANC


SENGIPHETHA, NGICELA UXOLO, BABA, NXAMALALA, UMA ULIMI LUPHAPHALAZILE. Kepha awozifaka nawe esithombeni engikuso: Selokhu ngabuya emzabalazweni ngihlushwa yisizwe-nje esisodwa saBaThembu esifuna ukungixosha emsebenzi ngamanga-nje aluhlaza sincediswa ngabeLungu abangaMaNgisi kwi SANDF.

Wawungenzenjani wena Baba uyimina?